Amerikalı elm adamları dünyanın ən kiçik ürək batareyasını hazırlayıblar. Düyü dənəsindən belə kiçik olan texnologiya ürək döyüntülərini müvəqqəti nizamlamaq üçün nəzərdə tutulub.

Aztibb.az bu barədə news.northwestern.edu-ya istinadla xəbər verir.

Yeni simsiz cihazın diametri 1, uzunluğu isə 3,5 millimetrdir. İynə ucuna sığacaq boyda olan batareya doğuşdan ürək xəstəliyi ilə dünyaya gələn azyaşlılar üçün əlverişlidir. Həmçinin ürək əməliyyatından sonra ritmi nizamlamaq məqsədilə də istifadə oluna bilər. İndiyə qədər olan ürək cihazları kabelli idi. Onları çıxaranda problemlər yaşanırdı. Hətta 2012-ci ildə bu səbəbdən astronavt Neil Armstrong həyatını itirmişdi. Yeni cihaz isə xəstənin bədəninə inyeksiya edilir, hər hansı simə ehtiyac yoxdur.

Cihaz indiyə qədər siçan, donuz və itlər üzərində sınaqdan keçirilib. ABŞ-ın Northwestern Universitetinin professoru John Rogers cihazın 2-3 il ərzində insanlar üzərində sınaqdan keçiriləcəyini bildirib. Çikaqo Universitetinin professoru Bozhi Tian isə yeni ürək cihazının tibb sahəsində inqilabi yenilik olduğunu və onun yalnız kardiologiya deyil, sinir bərpası, yara sağalması kimi sahələrdə də yeni imkanlar yaradacağını vurğulayıb