Azərbaycan Həmkarlar İttifaqları Konfederasiyasının üzv təşkilatı Azərbaycan Səhiyyə İşçiləri Həmkarlar İttifaqı Respublika Komitəsinin təşəbbüsü, Azərbaycan Atletika Federasiyası (AAF) və “Zəfər” Qaçış Klubunun təşkilatçılığı ilə Mingəçevir şəhərində səhiyyə işçiləri və Tibb kollecinin tələbələri arasında “Sağlamlığa Doğru Qaç!” adlı növbəti mərhələ yarışı keçirilib.
Aztibb.az-ın xəbərinə görə, əvvəlcə Ümummilli Lider Heydər Əliyevin abidəsi önünə gül dəstələri qoyularaq xatirəsi böyük ehtiramla yad edilib.
Sonra Azərbaycan Respublikasının Dövlət Himni səsləndirilib və torpaqlarımızın azadlığı uğrunda canını fəda etmiş şəhidlərin xatirəsi bir dəqiqəlik sükutla anılıb.
Yarışın əsas məqsədi 17 iyun – Tibb İşçilərinin Peşə Bayramı Gününə həsr edilən “Sağlamlığa Doğru Qaç!” layihəsi çərçivəsində tibb işçilərinin fiziki sağlamlığını təşviq etmək, asudə vaxtlarını səmərəli keçirmək, həmkarlar arasında birliyi gücləndirmək və yeni dostluqlar qurmaqdır.
Yarışda Mingəçevir şəhəri ilə yanaşı, Ağdaş, Ucar, Yevlax, Goranboy və Göyçay rayonlarından olan səhiyyə işçiləri də iştirak edib. 5 km məsafəni uğurla qət edən qadın və kişi iştirakçılar arasında ilk üçlükdə yer alan qaliblərə diplom və hədiyyələr təqdim olunub.
Tədbirin bədii hissəsində Mingəçevir Tibb Kollecinin tələbəsinin təqdim etdiyi milli rəqs alqışlarla qarşılanıb.
