Akademik Mirməmməd Cavadzadə adına Respublika Kliniki Uroloji Xəstəxanasında 40 yaşlı kişi pasiyent üzərində bukkal uretroplastika əməliyyatı uğurla həyata keçirilib.

 

Aztibb.az-a Xəstəxanadan bildirilib ki, pasiyent uzun müddətdir sidiyə getməkdə çətinlik çəkib və müxtəlif uroloqlara müraciət edərək müalicələr alıb. O, iki dəfə meatotomiya əməliyyatı keçirib və bir neçə dəfə uretranın bujlaması prosedurundan keçsə də, müsbət nəticə əldə olunmayıb.

 

Xəstəxanaya müraciət etdikdən sonra aparılan zəruri müayinələr nəticəsində ona penil uretranın 4,5 sm daralması diaqnozu qoyulub.

 

Urologiya şöbəsinin müdiri, tibb elmləri namizədi, uroloq Rüstəm Şibliyev tərəfindən pasiyentə bukkal uretroplastika əməliyyatı icra edilib.

 

Hazırda pasiyent stasionar müalicəsini davam etdirir.