Azərbaycan Respublikası Elm və Təhsil Nazirliyinin Biofizika İnstitutunun Elmi şurasının növbəti iclası baş direktor, AMEA-nın müxbir üzvü Oktay Qasımovun sədrliyi ilə keçirilib.

İnstitutdan Aztibb.az-a verilən xəbərə görə, iclasda “Sabahın Alimləri” XIV Respublika Layihə Müsabiqəsinin final mərhələsi müzakirə olunub. Bildirilib ki, Mübariz İbrahimov adına Biləsuvar Bağça-Məktəb-Lisey Kompleksinin X sinif şagirdləri Əlizadə Leyla və Quluzadə Gülay Biofizika İnstitutunda dosent Sevinc Cəfərovanın rəhbərliyi ilə tədqiqat apararaq Tibb və Sağlamlıq nominasiyası üzrə I yerə layiq görülüb və qızıl medalla təltif olunublar.

Biofizika İnstitutunun rəhbərliyi şagirdlərin bu uğurunun qazanılmasında xüsusi əməyi keçən, peşəkarlığı və elmi rəhbərliyi ilə gənc tədqiqatçıların yetişməsinə töhfə verən, öz sahəsində nüfuzlu mütəxəssis olan Sevinc Cəfərovaya təşəkkür edib və ona Təşəkkürnamə təqdim edib. Onun rəhbərliyi altında aparılan tədqiqatların yüksək elmi dəyəri və gənclərə verdiyi dəstək institut tərəfindən yüksək qiymətləndirilib.

Bundan əlavə, iclasda Biofizika İnstitutunda ixtisas fənnindən fəlsəfə doktoru imtahanının keçirilməsi ilə bağlı “Biofizika” ixtisası üzrə suallar müzakirə olunaraq səsvermə yolu ilə təsdiqlənib.

Həmçinin, AR ETN Elm və Ali Təhsil üzrə Dövlət Agentliyinin 18 mart 2025-ci il tarixli 3 məktubu müzakirə edilib və müvafiq qərarlar qəbul olunub.

İclasın sonunda bir sıra cari məsələlərə baxılıb və müzakirələr aparılıb.