Prezident İlham Əliyevin müvafiq Sərəncamına uyğun olaraq “Korrupsiyaya qarşı mübarizənin gücləndirilməsinə dair 2022-2026-cı illər üçün Milli Fəaliyyət Planı”nın icrası ilə əlaqədar “Azərbaycan Respublikası Dövlət Gömrük Komitəsinin 2025-ci il üçün Tədbirlər Planı”na uyğun olaraq Tibbi Xidmət İdarəsinin antikorrupsiya davranış modelinin formalaşdırılması ilə bağlı 2025-ci il üçün Fəaliyyət Planında nəzərdə tutulmuş tədbirlərin icrası və qarşıda duran vəzifələrlə bağlı Mərkəzi Gömrük Hospitalında “Korrupsiyaya qarşı mübarizə” mövzusunda tədbir keçirilib.

Hospitaldan Aztibb.az-a bildirilib ki, tədbirdə hospitalın rəhbər şəxsləri, şöbə rəisləri, inzibati işçilər, baş və böyük tibb bacıları iştirak ediblər.

Tədbirdə Dövlət Gömrük Komitəsinin Tibbi Xidmət İdarəsinin rəis müavini Şahlar Mirqasım korrupsiyaya şərait yaradan halların qarşısının alınması sahəsində vacib tədbirlər, korrupsiya əməllərinə görə tətbiq edilən məsuliyyət tədbirləri, korrupsiyaya şərait yaradan amillər, maraqların toqquşması, məlumat təhlükəsizliyi, korrupsiyanın tibb sahəsinə göstərdiyi neqativ təsirləri barədə ətraflı məlumat verib. O, antikorrupsiya davranış modelinin formalaşdırılması ilə əlaqədar Dövlət Gömrük Komitəsinin Tibbi Xidmət İdarəsinin təşkilatçılığı ilə 2025-ci il üçün əməkdaşlar üçün maarifləndirici təlimlərin keçiriləcəyini bildirib.

Mərkəzi Gömrük Hospitalının rəisi, baş həkim Bəxtiyar Musayev korrupsiyaya qarşı mübarizə çərçivəsində hospitalın fəaliyyətinin şəffaf və uğurlu təşkili sahəsində həyata keçirilən işlər, korrupsiya hüquqpozmalarına qarşı ciddi və səmərəli mübarizə üsulları, eləcə də qarşıda duran tədbirlərdən danışıb. Baş həkim Bəxtiyar Musayev bütün əməkdaşları korrupsiyaya qarşı mübarizədə fəal iştirak etməyə, bu mövzuda diqqətli və həssas olmağa dəvət edib.

Tədbirin yekununda iştirakçıları maraqlandıran suallar ətraflı cavablandırılıb.