Son illər sürətlə yayılan mədə xərçəngi ölkəmizdə ən çox rast gəlinən xərçənglər arasında 5-ci yerdədir. Lakin erkən diaqnoz üçün heç bir skrininq üsulu olmadığı üçün daha çox inkişaf mərhələsində diaqnoz qoyulan bu məkrli xəstəlik xərçəngdən ölüm hallarının üçüncü səbəbi olub.

Aztibb.az "Haber Türkə" istinadən yazır ki, professor Erman Aytaçın sözlərinə görə, son illərdə mədə xərçənginin müalicəsində əhəmiyyətli irəliləyişlərin olub, xüsusilə cərrahiyyə, dərman müalicəsi, immunoterapiya və radioterapiya sahələrində xəstələr üçün daha təsirli və rahat üsulların tətbiq olunmağa başlanılıb: "Artıq mədə xərçəngi əməliyyatında daha minimal invaziv üsullara üstünlük verilir. Bu robot cərrahiyyə sayəsində açıq əməliyyatlara nisbətən daha sürətli sağalma əldə edilir. Böyük kəsiklər etmədən əməliyyatlar etmə imkanımız var və bu üsulu gündəlik praktikamızda getdikcə daha çox istifadə edirik. Bundan əlavə, endoskopik üsullarla çox erkən mərhələdə olan mədə xərçənglərini həm diaqnoz qoymaq, həm də müalicə etmək mümkündür".

Mədə xərçənginin müalicəsində daha bir böyük addımın dərman müalicəsi olduğunu ifadə edən professor müəyyən genetik xüsusiyyətlərə malik mədə xərçənglərində kimyaterapiyadan daha təsirli olan immunoterapiyanın önə çıxdığını vurğulayıb:

"İmmunoterapiya orqanizmin immun sistemini aktivləşdirir, şişi daha az yan təsirlə və daha müvəffəqiyyətlə müalicə etməyə imkan verir. Bilirik ki, immunoterapiya xəstələrə xüsusilə cərrahi müalicə ilə yaxın bir şəkildə müalicə imkanı verir. Mədə xərçəngində ən təsirli üsul olan immunoterapiya bəzi xəstələrdə əməliyyata yaxın bir nisbətdə tam sağalma təmin edə bilər, lakin bu üsul hələ də təcrübi bir yanaşma olaraq qəbul edilir."

Mədə və qida borusunun qovuşduğu bölgədə xərçənglərin müalicəsində yeni yanaşmaların olduğunu vurğulayan professor bu xəstələrdə əvvəllər kimyaterapiya və radioterapiyanın birlikdə tətbiq edildiyini, lakin yeni araşdırmaların güclü kimyaterapiya ilə radioterapiyasız cərrahiyyənin oxşar nəticə verdiyini göstərdiyini bildirib.