Oğuz rayonunda məktəb kollektivi və şagirdlər arasında "Vərəm xəstəliyi və profilaktikası" mövzusunda maarifləndirici tədbir keçirilib.
Oğuz RMX-dan Aztibb.az-a bildirilib ki, tədbir Oğuz rayonu Padar kənd Arzu Əliyev adına tam orta məktəbində, Xaçmaz kənd Mirzə Fətəli Axundov adına tam orta məktəb və Zülfüqar Abışov adına ümumi orta məktəblərdə baş tutub.
Oğuz Rayon Mərkəzi Xəstəxanasının həkim-ftiziatrı Mərziyyə Lətifova, Padar kənd həkim məntəqəsinin müdiri Aysel Məcidova və Xaçmaz kənd ASM-in həkim pediatrı Vəfa Əliyeva tərəfindən vərəm xəstəliyi və ağırlaşmaları, profilaktik müayinələrin zamanında aparılması, vərəm xəstələri ilə təmasda olanların daim nəzarətdə saxlanılması və Diaskin-Mantu sınağı haqqında geniş məlumat verilib.
Müzakirə formatında keçirilən tədbirdə şagird və müəllimləri maraqlandıran suallar cavablandırılıb.
Qeyd edək ki, bu istiqamətdə tədbirlərin mütəmadi olaraq keçirilməsi nəzərdə tutulub.
