Uzun illər Gəncə səhiyyəsində çalışan Əməkdar həkim Namiq Nəbiyev 69 yaşında dünyasını dəyişib.
Aztibb.az xəbər verir ki, Nəbiyev Namiq Mobil oğlu 1956-cı il noyabrın 26-da Gəncə şəhərində anadan olub. 1979-cu ildə Azərbaycan Dövlət Tibb İnstitutunun hazırlıq şöbəsini oxuduqdan sonra həmin institutun birinci kursuna daxil olub. 1985-ci ildə Müalicə-profilaktika fakultəsindən məzun olan Namiq Nəbiyev Gəncə şəhəri Təcili Tibbi Yardım Xəstəxanasının terapiya şöbəsində internatura kursu keçib. Növbəti ildə həmin tibb müəssisəsində çağırışçı həkim vəzifəsinə qəbul olunub, 1993-cü ildə baş həkimin müalicə işləri üzrə müavini, 2000-ci ildən isə bu tibb ocağında şöbə müdiri vəzifələrində çalışıb. 2023-cü ildə yaşla əlaqədar təqaüdə çıxıb.
Namiq Nəbiyev 2007-ci ildə Azərbaycan Respublikası Prezidentinin Sərəncamına əsasən “Azərbaycan Respublikasının Əməkdar həkimi” fəxri adına layiq görülüb.
