Sərhədsiz Həkimlər Təşkilatı (MSF) 2024-cü ilin əvvəlindən Yəməndə 63 mindən çox vəba xəstəliyinin müşahidə edildiyini açıqlayıb.
Aztibb.az medimagazin.com.tr-yə istinadla xəbər verir ki, MSF-nin verdiyi yazılı açıqlamada, Yəmənin 20 şəhərində vəba xəstəliyində ciddi artım olduğu bildirilib.
Yerli hakimiyyət orqanlarının məlumatına görə, ilin əvvəlindən mayın 31-dək ölkədə 63 mindən çox vəbaya yoluxma qeydə alınıb.
Təxminən 10 ildir davam edən vətəndaş müharibəsi səbəbindən Yəmən humanitar şərait və səhiyyə baxımından dünyanın ən pis böhranlarından birini yaşamağa davam edir.
Müharibə səbəbiylə ölkədə bir çox epidemik xəstəlik yayılsa da, 2024-cü ilin əvvəlindən vəba xəstəliyində ciddi artım müşahidə olunur.
Ümumdünya Səhiyyə Təşkilatının (ÜST) məlumatlarına görə, Yəməndə səhiyyə müəssisələrinin yalnız 51 faizi tam fəaliyyət göstərir və 36 faizi məhdud xidmət göstərir.
