Üç gün davam edən konfransda ölkəmizi Azərbaycan Oftalmoloqlar Cəmiyyəti sədrinin müavini, akademik Zərifə Əliyeva adına Milli Oftalmologiya Mərkəzinin Elmi-məlumat, təşkilati-metodik bölməsinin rəhbəri, tibb üzrə fəlsəfə doktoru Yazgül Abdıyeva, ATU-nun Oftalmologiya kafedrasının dosenti Hafiz Qəhrəmanov, Göyçay rayonunun həkimləri Nurməmməd Nuriyev və Şəfaqət İmranova təmsil ediblər.

 

24-cü CSCRS (Çin Katarakt və Refraktiv Cərrahiyyə Cəmiyyəti) ilə birgə təşkil edilən 36-cı APACRS görüşündə dünyanın bir çox ölkələrindən gələn alim oftalmoloqlar və tədqiqatçılar öz sahələrində olan ən son elmi nailiyyətləri müzakirə ediblər.

 

Qeyd edək ki, APACRS-in il üzrə bütün fəaliyyətini nümayiş etmək üçün Asiya-Sakit okean regionunun müxtəlif ölkələrində illik konfranslar həyata keçirilir. Cəmiyyətin illik toplantısında Asiya-Sakit Okean bölgəsindəki həkimlər üçün uyğunlaşdırılmış və müvafiq olaraq diqqətlə hazırlanmış elmi proqram təqdim olunur. Proqrama dünyanın hər yerindən yüksək səviyyəli təqdim olunan mühim təcrübə materialları daxildir. Burada oftalmologiyada olan son elmi yeniliklər, təcrübələr və tədqiqatlar nümayiş edilir.

 

APACRS illik toplantısı katarakt və refraktiv cərrahiyyə üzrə ən mühim regional görüşə və qlobal oftalmoloji təqvimdə ən mühim təhsil tədbirlərindən birinə çevrilib. Bu və digər fəaliyyətlər vasitəsilə APACRS dünya əhalisinin yarısından çoxunun katarakta və refraktiv cərrahiyyə ehtiyaclarına xidmət etmək üçün onları dünyanın başqa yerlərindən olan beynəlxalq tərəfdaşlarla bir araya gətirərək, regionun ən görkəmli yerli təşkilatları ilə sıx əməkdaşlıqda işləməyə davam edir.