Slovakiyada əhali mütəmadi olaraq koronavirusa qarşı antigen testlərindən keçiriləcək.

Aztibb.az xəbər verir ki, Slovakiyanın Baş naziri İqor Matoviç bu addımı ümumölkə karantinindən yayınmaq üçün ən yaxşı alternativ kimi dəyərləndirib. İ.Matoviç “Dennik N“ qəzetinə verdiyi müsahibədə bildirib ki, milyonlarla insanı işsiz qoyaraq və mağazaları bağlı saxlayaraq bütün Slovakiyanı lokdauna göndərməkdənsə, həftədə bir dəfə ölkədə bütün əhalini testdən keçirmək daha məqsədəuyğundur.

Qeyd edək ki, ötən həftəsonu ilk dəfə və noyabrın 7-8-də ikinci dəfə Slovakiyada bütün əhali koronavirusa qarşı antigen testlərinə cəlb edilib. İlk mərhələdə 38 min insanın test nəticələri müsbət olub və həmin insanlar karantinə alınıb. Baş nazir bildirib ki, virusun əlamətlərini büruzə verməyən bu insanlar ümumölkə testlərinə cəlb olunmasaydılar, ölkədə virusun daha da sürətlə yayılması baş verəcəkdi.

Hazırda Slovakiyada koronavirusa gündəlik yoluxma səviyyəsi 2000-2500 arasında dəyişir. Hökumət Avropada ilk və yeganə üsulla ölkədəki yoluxmanın səviyyəsini aşağı salacağına və ölkə iqtisadiyyatını ağır karantindən qoruyacağına ümid edir.