Azərbaycan Tibb Universiteti (ATU) Avropanın qabaqcıl tibb müəssisələri və ali məktəbləri ilə əməkdaşlıq münasibətlərini genişləndirməkdə maraqlıdır.

Aztibb.az xəbər verir ki, bu fikir ATU-nun rektoru professor Gəray Gəraybəylinin almaniyalı qonaqlarla görüşü zamanı səslənib.

Rektor Gəray Gəraybəyli Köln Universitetinin professoru, Köln-Weyertal Xəstəxanasının Ginekologiya və Mamalıq şöbəsinin direktoru, Dr med. Thomas Römer və xəstəxananın aparıcı həkimi, Witten-Herdekce Universitetinin dosenti Elvin Piriyevlə görüşündə universitetin iştirak etdiyi beynəlxalq tərəfdaşlıq layihələrindən söz açıb.

ATU məzunlarının rezidentura təhsili üçün daha çox müraciət etdiyi ölkələrdən birinin Almaniya olduğunu qeyd edən G.Gəraybəyli bu ölkənin tibb təhsili müəssisələri ilə əməkdaşlığın yeni istiqamətlərinin müzakirəyə ehtiyacı olduğunu bildirib.