Mərkəzi Gömrük Hospitalının Təcili Tibbi Yardım şöbəsinin tibb heyəti və Çağrı Mərkəzinin əməkdaşları 10-11 aprel 2024-cü il tarixlərində - Ramazan bayramı günlərində fasiləsiz təcili tibbi yardım xidməti göstərəcək və daxil olan bütün zənglərin qəbulunu, telefon, elektron poçt, votsap, facebook, instaqram və internet-çat vasitəsi ilə daxil olan müraciətlərin operativ şəkildə cavablandırılmasını təmin edəcəklər.
Aztibb.az xəbər verir ki, Mərkəzi Gömrük Hospitalının Təcili Tibbi Yardım heyətinin çağırış nömrəsi 905, Çağrı Mərkəzinin əlaqə nömrəsi (012) 404-08-08-dir. Mərkəzi Gömrük Hospitalının Təcili Tibbi Yardım şöbəsinin təcili yardım maşınları ən müasir portativ tibbi avadanlıqla təchiz olunub. Bu da diaqnostik-müalicəvi prosedurların tez və keyfiyyətlə aparılmasına, xəstələrin daşınması zamanı monitorinq və reanimasiya tədbirlərinin icra olunmasına imkan verir.
Həmçinin, pediatrik briqada yeni doğulmuş körpələrin xüsusi kuveyzlə daşınmasını, evdən laborator analizlərin götürülməsini, evdə və iş yerlərində ekspres-testlərin aparılmasını həyata keçirir. Təcili yardım maşınlarının komplektasiyası istənilən vəziyyətdə olan pasiyentlərin daşınmasına imkan verir: pasiyent xəstəxanaya aparılarkən yolda müalicə almağa başlayır.
Mərkəzi Gömrük Hospitalının Çağrı Mərkəzi bura müraciət edən insanların sorğularını cavablandıran, vətəndaşlara Hospitalın həkimləri və xidmətləri barəsində dolğun və ətraflı məlumatlar verən, pasiyentlərin həkimlər ilə vaxtında və çevik şəkildə əlaqə qurmasını təmin edən informasiya qovşağıdır.
