“Həkimlərimizi tanıyaq!” rubrikamızda Sizlərə uşaqlara qarşı çox mehriban və qayğıkeş olan, onların hər birinə fərdi yanaşaraq sağlamlıqlarının keşiyində durmağı özünə borc bilən pediatr Şahnaz Zamanlını təqdim edirik.

Şahnaz Zamanlı 2019-cu ildə Azərbaycan Tibb Universitetinin Müalicə işi fakültəsini bitirib. 2019-2023-cü illərdə Azərbaycan Tibb Universitetində pediatriya ixtisası üzrə rezidentura təhsili alıb. Mərkəzi Gömrük Hospitalının pediatriya şöbəsinin rəisi, pediatr-neonatoloq-reanimatoloq Telman Aytayevin yanında həkim-rezident olaraq rotasiya keçib.

O, 2024-cü ildən Mərkəzi Gömrük Hospitalında pediatr kimi fəaliyyətə başlayıb.

Həkim Mərkəzi Gömrük Hospitalında yeni doğulmuş uşaqların müayinəsi, sağlam uşaqların anadan olduğu dövrdən 17 yaşa kimi olan dövrdə təqibi, uşaqlarda peyvəndlərin aparılması, uşaqlarda qastroenteroloji, pulmonoloji, allergik, otolarinqoloji və infeksion xəstəliklərin müalicəsi, inkişaf geriliyi olan uşaqlara düzgün yanaşma və düzgün diaqnozun qoyulması ilə məşğul olur.

Şahnaz Zamanlı özünə qarşı tələbkar və işində məsuliyyətlidir. Eyni zamanda, tibbin son nailiyyətlərini izləyir və öyrənir. O, 2019-cu ildə Bakıda Azərbaycan Tibb Assosiasiyasının Pediatriya dərnəyinin “Pediatriyada yeniliklər” mövzusunda IX simpoziumunda, 2020-ci ildə Perinatal Təbabət üzrə Beynəlxalq konfransda və Türkiyənin İstanbul şəhərində 64-cü Türkiyə milli pediatrik konqresində onlayn formatda, 2023-cü ildə İsrailin Beerşeba şəhərində keçirilən İsrail Pediatriyasının online qış məktəbində, yenə həmin ildə Bakıda keçirilən Neonatal Reanimasiya Proqramı üzrə təlimdə iştirak edib.

O, Azərbaycan Pediatriya Cəmiyyətinin üzvüdür.