Mərkəzi Gömrük Hospitalında istehsalat təcrübəsi keçən 1 nömrəli Bakı Tibb Kolleci və 2 nömrəli Bakı Baza Tibb Kollecinin tələbələri üçün təlimlərə start verilib.

Aztibb.az-a Hospitaldan verilən xəbərə görə, Dövlət Gömrük Komitəsinin Tibbi xidmət İdarəsinin Elmi-Təcrübi Tədris Mərkəzi tərəfindən hazırlanmış Təlim Fəaliyyət Planına uyğun olaraq ilk mövzu “Tibbi deontologiya və etik davranış qaydaları - Tibb bacılarının işində ünsiyyət: Tibbi yardımın xəstə yönümlü modelinin etik və deontoloji aspektləri”nə həsr olunub.

Təlimdə Dövlət Gömrük Komitəsi Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev tələbələri salamlayaraq Mərkəzi Gömrük Hospitalında onların praktiki bacarıqlarla yanaşı nəzəri biliklərinin də təkmilləşdirilməsi istiqamətində mütəmadi olaraq icra olunacaq təlimlər barədə geniş məlumat verib. Tibb bacılarının fəaliyyətində etik prinsiplərə riayət edilməsinin və ünsiyyətin mühüm rol oynadığını vurğulayan İ.Əfəndiyev tələbələri təlimlərdə aktiv iştirak etməyə dəvət edib.

Daha sonra Mərkəzi Gömrük Hospitalının tibb bacısı Nigar Maqsudova tibb bacısının fəaliyyətində tibbi etika və xəstəyönümlü fəaliyyətlərin təşkilində tibb bacısının ünsiyyət bacarıqlarının vacibliyi barədə geniş təqdimatla çıxış edib.

Təqdimatın sonunda tələbələrin sualları cavablandırılıb, təlimlərin təşkili ilə bağlı rəy və təkliflər dinlənilib.