Azərbaycan Respublikası Səhiyyə Nazirliyi K.Y. Fərəcova adına Elmi-Tədqiqat Pediatriya İnstitutunda (ETPİ) seminar keçirilib.

 

ETPİ-dən Aztibb.az-a bildirilib ki, konfransda institutun rəhbərliyi, həkim kollektivi, elmi işçilər, ATU-nun I və II uşaq xəstəlikləri kafedrasında təcrübə məşğələləri keçən tələbələr, rezidentura təhsili alan həkim-rezidentlər iştirak ediblər.

 

Konfransda pediatr Gülnaz Ağayevanın rəhbərliyi altında həkim rezident Samirə Məmmədzadə “Qızdırma və qızdırmalı xəstələrdə klinik müşahidə” mövzusunda təqdimatla çıxış edib.

 

Seminarda qızdırmaya səbəb olan amillər, qızdırmanın patogenezinde interleykin və prostaqlandinlərin rolu, qızdırmanın təsnifatı, qızdırmanın markerləri, qızdırma ilə hipertermiyanin fərqi, qızdırmanın bioloji əhəmiyyəti, piroterapiya haqqında məlumat verilib.

 

Daha sonra institutun rəhbərliyi tərəfindən maraqlı və az rast gəlinən, müzakirəyə ehtiyacı olan xəstəlik tarixlərinin araşdırılması, bu xəstəliklər haqqında nəzəri materialların hazırlanması həkim-rezidentlərə həvalə edilib.

 

Sonda mövzu ətrafında geniş müzakirələr aparılıb, həkim və rezidentlərin sualları cavablandırılıb.