Azərbaycan Respublikası Silahlı Qüvvələri tərəfindən 2023-cü il 19-20 sentyabr tarixlərində aparılan antiterror tədbirləri zamanı şəhidlik zirvəsinə ucalan Qasımov Cahan Xəqani oğlunun Səhiyyə Nazirliyi Elmi-Tədqiqat Mamalıq və Ginekologiya İnstitutunda qız övladı dünyaya gəlib.

 

Bu barədə Aztibb.az-a İnstitutdan məlumat verilib.

 

Müddətdən artıq həqiqi hərbi xidmət hərbi qulluqçusu olan Cahan Qasımov 20 sentyabr 2023-cü il tarixində həyata keçirilən uğurlu lokal antiterror tədbirləri zamanı Xocavənd istiqamətində gedən döyüşlərdə ağır yaralanıb və 30 sentyabr tarixində şəhid olub.

 

Cahan Qasımov ölümündən sonra Azərbaycan Respublikasının Prezidenti İlham Əliyevin Sərəncamına əsasən “Vətən uğrunda” medalı və 3-cü dərəcəli “Vətənə xidmətə görə” ordeni ilə təltif edilib.

 

Şəhidin həyat yoldaşı 37 həftəlik hamiləlik, normal yerləşmiş ciftin vaxtından əvvəl hissəvi qopması, başlanmış hipoksiya diaqnozu ilə ETMGİ-nin Qəbul şöbəsinə müraciət edib. Döldə başlanmış hipoksiya və qanama səbəbindən həkim mama-ginekoloq, tibb üzrə fəlsəfə doktoru Kifayət Adıgözəlova tərəfindən qadın təcili şəkildə qeysəriyyə əməliyyatına götürülüb. Uğurla icra olunan cərrahi doğuş zamanı çəkisi 2450 qram, boyu 49 sm olan qadın cinsli körpə dünyaya gəlib.

 

Ana və körpə sağlam şəkildə evə yola salınıb.