Azərbaycan dövləti ölkə ərazisində vətəndaşlarının təhlükəsiz yaşamasının qarantıdır. Vətəndaşlarımızın, qəhrəman hərbçilərimizin arxasında güclü Azərbaycan dövləti dayanır.

Aztibb.az xəbər verir ki, Milli Məclisin Səhiyyə Komitəsinin sədri, Azərbaycan Tibb Universitetinin Onkoloji Klinikasının direktoru, Azərbaycan-Türkiyə Parlamentlərarası dostluq qrupunun sədri, akademik Əhliman Əmiraslanov belə deyib.

O, qeyd edib ki, Ermənistan Silahlı Qüvvələrinin iyulun 12-dən etibarən Tovuz rayonu istiqamətində xaincəsinə və hədəflənmiş şəkildə yaşayış məntəqələrimizi, dinc əhalini iri çaplı silahlardan və ağır artilleriya qurğularından intensiv atəşə tutması nəticəsində həmin kəndlərdə yaşayan mülki əhaliyə, dövlət əmlakına, o cümlədən infrastruktur obyektlərinə ciddi ziyan dəyib. Dəymiş ziyanın aradan qaldırılması məqsədilə ölkə Prezidenti tərəfindən müvafiq sərəncam imzalanıb və onun icrasına başlanılıb. İşlərin gedişi dövlət başçısının şəxsi nəzarətindədir.

"Azərbaycan dövləti hər zaman vətəndaşının yanındadır", - deyə bildirən Əhliman Əmiraslanov qeyd edib ki, dövlətimiz Azərbaycanının ərazı bütövlüyü uğrunda vuruşanları, canını fəda edənləri heç vaxt unutmur, onlara və ailələrinə hər zaman həssaslıqla yanaşır. Tovuz rayonu istiqamətində döyüşlərdə şəhid olan bütün hərbi qulluqçuların ailələrinin qayğıları öyrənilir və onların həlli istiqamətində müvafiq addımlar atılır.

Akademikin sözlərinə görə, mülki əhaliyə və dövlət əmlakına dəymiş ziyanın aradan qaldırılması üçün bütün qüvvələr səfərbərliyə alınıb: "Dəymiş zərər tezliklə aradan qaldırılacaq, ziyan dəymiş infrastruktur və evlər bərpa olunacaq. Həmin kəndlərdə həyat tez bir zamanda tamamilə öz məcrasına qayıdacaq".