Azərbaycan Respublikası Dövlət Gömrük Komitəsinin Tibbi Xidmət İdarəsinin Azərbaycan Respublikası Səhiyyə Nazirliyi 1 nömrəli Bakı Tibb Kolleci və Səhiyyə Nazirliyi 2 nömrəli Bakı Baza Tibb Kolleci arasında imzaladığı əməkdaşlıq memorandumları çərçivəsində tələbələr 16 fevral 2024-cü il tarixindən etibarən Mərkəzi Gömrük Hospitalının müxtəlif şöbələrində istehsalat təcrübəsinə başlayıblar.
Aztibb.az-a bu barədə Gömrük Hospitalından xəbər verilib.
Hospitalda hər iki tibb kollecinin istehsalat təcrübəsinə başlayan tələbələri ilə görüş keçirilib.Tədbirdə Mərkəzi Gömrük Hospitalının rəisi-Baş həkim Bəxtiyar Musayev, baş tibb bacısı Gülyaz Fərəcova və Dövlət Gömrük Komitəsi Tibbi Xidmət İdarəsi İnzibati idarəetmənin təşkili şöbəsinin rəisi Minurə Ağayeva iştirak ediblər.
Tədbiri giriş sözü ilə açan Mərkəzi Gömrük Hospitalının rəisi-Baş həkim Bəxtiyar Musayev tələbələrə istehsalat təcrübə müddətində intizamlı, işə münasibətdə məsuliyyətli olmağı tövsiyə edib, eləcə də şəfqət bacılarının pasiyentlərin şəfa tapmasında rolundan danışıb.
Dövlət Gömrük Komitəsi Tibbi Xidmət İdarəsi İnzibati idarəetmənin təşkili şöbəsinin rəisi Minurə Ağayeva və baş tibb bacısı Gülyaz Fərəcova tələbələrin təhkim olunduqları şöbələr, şöbərləin işi və iş cədvəli barədə ətraflı məlumat veriblər. Tədbirin sonunda tələbələri maraqlandıran suallar cavablandırılıb.