Ümumdünya Səhiyyə Təşkilatının (ÜST) tropik xəstəliklər bölməsinin direktoru Raman Velayudhan bildirib ki, 2023-cü ildə dünyada 5,5 milyondan çox insanda denge qızdırması aşkarlanıb və bu xəstəlikdən 5 min nəfər ölüb.
Aztibb.az-ın medimagazin.com.tr-yə istinadla məlumatına görə, Velayudhan Birləşmiş Millətlər Təşkilatının (BMT) Cenevrə ofisinin həftəlik mətbuat konfransında denge qızdırmasının qlobal vəziyyəti ilə bağlı qiymətləndirmələr edib.
O, denge qızdırmasının əsas daşıyıcısı olan və yayılma sahələri genişlənən ağcaqanadların ətraf mühit dəyişiklikləri və iqlim şəraitinin təsiri ilə Aralıq dənizi regionunda daha çox ölkədə yayıldığını bildirib.
Velayudhan, 2023-cü ildə Amerika qitəsində 4,5 milyon insanda denge qızdırmasına yoluxmanın olduğunu və bunun bir ildə eyni qitədə görülən ən yüksək rəqəm olduğunu vurğulayıb.