Azərbaycan Tibb Universitetinin (ATU) rektoru, professor Gəray Gəraybəyli Erasmus layihəsi çərçivəsində xarici ölkələrdə praktika keçən və yeni təcrübə proqramına hazırlaşan tələbələrlə görüşüb.

Aztibb.az-a ATU-dan verilən xəbərə görə, görüşdə iştirak edən II Müalicə-profilaktika fakültəsinin V kurs tələbəsi Vahidi Səid ötən tədris illərində yaz və payız semestrini Litva Sağlamlıq Elmləri Universitetinin Tibb fakültəsində praktikada olduğunu deyib. O, Kaunas şəhərində yerləşən tibb müəssisəsində əldə etdiyi təcrübə haqqında məlumat verib və sonda rektora yaradılan şərait üçün təşəkkürünü bildirib.

ATU-nun Əczaçılıq fakültəsinin III kurs tələbəsi Türkanə Əliyeva isə 2023-2024-cü tədris ilinin yaz semestrini Anadolu Universitetinin əczaçılıq fakültəsində keçirəcəyini qeyd edib. Yaxın günlərdə proqramda iştirak məqsədilə Eskişehirə ola düşəcəyini bildirən tələbə bu imkana görə universitet rəhbərliyinə təşəkkr edib.

Bu gün ATU-nun dünyanın bir çox tanınmış universitetləri ilə ortaq layihələr reallaşdırdığını deyən professor G.Gəraybəyli bu əlaqələrin tələbələrin təcrübəsinin artırılması və inkişafının geücləndirilməsinə yönəldiyini qeyd edib. Rektor tələblərə uğurlar arzulayaraq, onları fəal olmağa, yaradılan hər bir imkandan yararlanmağa çağırıb.