Azərbaycan Respublikası Dövlət Gömrük Komitəsinin Çağrı Mərkəzinin əməkdaşları üçün təlim keçirilib.

 

Mərkəzi Gömrük Hospitalından Aztibb.az-a verilən xəbərə görə, təlimdə açılış nitqi ilə çıxış edən Dövlət Gömrük Komitəsi Tibbi Xidmət İdarəsinin rəis müavini İsmayıl Əfəndiyev gömrük orqanları və qurumların əməkdaşları arasında işlə bağlı stress və onun qarşısının alınmasına dair 2024-cü ildə davamlı olaraq maarifləndirici təlimlərin keçiriləcəyi barədə məlumat verib və əməkdaşların işgüzarlığının artırılmasında bu təlimlərin vacibliyini vurğulayıb.

 

Tədbirdə Mərkəzi Gömrük Hospitalının psixiatrı t.ü.f.d., Gülay Məmmədzadə “İnsanlarla işləyən insanlar: Stressə davamlılığın artırılması”, Tibbi Xidmət İdarəsinin Elmi-Təcrübi Tədris Mərkəzinin mütəxəssisi Şəhla Mirzəzadə “Effektiv iş mühitinin yaradılmasında komanda işi və effektiv ünsiyyətin əhəmiyyəti” və PR üzrə mütəxəssis Dilarə Zamanova “Vaxtın idarə edilməsi” mövzularında təqdimatlarla çıxış ediblər.

 

Təlimdə stressin iş prosesinə və sağlamlığa göstərdiyi mənfi amillər, vaxtın düzgün və səmərəli idarə edilməsinin qaydaları və iş prosesində tətbiqinin işgüzarlığa göstərdiyi müsbət təsirləri, effektiv iş mühitinin yaradılmasında komanda işinin və effektiv ünsiyyətin əhəmiyyəti mövzularında danışılıb.

 

Təlim tədbir iştirakçıları tərəfindən maraqla qarşılanıb və mövzular ətrafında geniş müzakirələr aparılıb.