Tərtər şəhər 2 saylı tam orta məktəbində “Erkən nikahın və qohumlar arasında nikahın mənfi nəticələri!” və “Narkomaniyaya yox deyək!” mövzusunda tədbir keçirilib.
Tərtər Rayon Mərkəzi Xəstəxanasından Aztibb.az-a verilən xəbərə görə, tədbirdə tibb müəssisəsinin psixoloqu Təranə Əmiraslanlı da iştirak edib.
O, erkən nikahın gənclərə, ailələrə, bütövlükdə cəmiyyətə vurduğu zərərlərdən və bu problemin aradan qaldırılması yolları haqqında danışıb. Psixoloq erkən nikah hallarına zəmin yaradan əsas səbəblərdən birincisinin təhsildən yayınmaq olduğunu bildirib.
T.Əmiraslanlı diqqətə çatdırıb ki, valideynlərin maddi imkansızlıq bəhanəsi ilə övladlarını məktəbdən uzaqlaşdırması son nəticədə erkən nikaha yol açır. Bunun qarşısının alınması üçün ardıcıl maarifləndirmə tədbirlərinin aparılması zəruridir.
Həkim, həmçinin dövrümüzün bəlası olan narkomaniyanın insanlara vurduğu maddi və mənəvi zərərlərdən danışıb. Təranə xanım şagirdlərə diqqətli olmağı, narkotik aludəçisinə çevrilmiş şəxslərdən uzaq durmağı tövsiyə edib.
Tədbirin sonunda iştirakçıları maraqlandıran suallar cavablandırılıb.