Bu gün Tibbi Ərazi Bölmələrini İdarəetmə Birliyinin (TƏBİB) tabeliyindəki Akademik Mirməmməd Cavadzadə adına Respublika Kliniki Uroloji Xəstəxanasında Dünya Azərbaycanlılarının Həmrəyliyi Günü və ilin yekunu ilə əlaqədar hesabat konfransı keçirilib.

TƏBİB-dən Aztibb.az-a verilən məlumata görə, konfransda Klinikanın direktoru Fariz Babayev əməkdaşları Dünya Azərbaycanlılarının Həmrəyliyi Günü və Yeni il münasibətilə təbrik edib, onlara cansağlığı və fəaliyyətlərində uğurlar arzulayıb.

Fariz Babayev klinikanın tarixi, elmi, tədris-metodiki fəaliyyəti, urologiya sahəsinə verdiyi töhfələr, potensialı barədə geniş məlumat verib.

Daha sonra Klinikanın yaranması və fəaliyyəti, eləcə də təmirdən sonra cənab Prezident İlham Əliyevin klinikaya səfərini əks etdirən videoçarx nümayiş etdirilib.

Sonda Akademik Mirməmməd Cavadzadə adına Respublika Kliniki Uroloji Xəstəxanasında çalışan bir neçə əməkdaş xüsusi hədiyyələrlə təltif olunub.