Azərbaycan Respublikası Dövlət Gömrük Komitəsi Tibbi Xidmət İdarəsinin rəis müavini, t.ü.f.d., dosent İsmayıl Əfəndiyevin sədrliyi ilə Bio-Etika komissiyasının növbəti iclası keçirilib.
Mərkəzi Gömrük Hospitalından Aztibb.az-a verilən xəbərə görə, iclasda ötən ilin yekunları, hazırda Hospitalın bazasında keçirilən iki klinik tədqiqatın gedişi, 2024-cü il üçün planlar müzakirə olunub.
Bio-Etika komissiyasında, həmçinin Mərkəzi Gömrük Hospitalının həkimləri tərəfindən Hospitalın bazasında iki yeni klinik tədqiqatın aparılması ilə bağlı daxil olmuş müraciətlərə baxılıb.
Əsas tədqiqatçılar çıxış edərək hər bir klinik tədqiqat haqqında məlumat verib, komissiya üzvlərinin suallarını cavablandırıblar.
Komissiya üzvləri tədqiqatların genişləndirilməsi, bəzi yeni aspektlərin daxil edilməsi ilə bağlı öz təkliflərini veriblər. Müzakirələr nəticəsində tədqiqatların müəyyən düzəlişlərdən sonra yenidən təqdim edilməsi və Bio-Etika Komissiyasının 18 yanvar 2024-cü il tarixində keçiriləcək növbəti iclasında baxılması haqqında qərar qəbul edilib.