ÜST-nin Azərbaycandakı Nümayəndəliyinin dəstəyi ilə Azərbaycan nümayəndə heyəti Ümumdünya Səhiyyə Təşkilatının Universal Tibbi Təminat (UTT) üçün Səhiyyənin Maliyyələşdirilməsi üzrə Barselona Kursunda iştirak edib.

 

Bu barədə Aztibb.az-a ÜST-nin Azərbaycandakı Nümayəndəliyindən xəbər verilib.

 

ÜST-nin Barselona Səhiyyə Sistemlərinin Maliyyələşdirilməsi Ofisi, Avropa İttifaqı və İspaniyanın Kataloniya Hökuməti tərəfindən dəstəklənən bir həftəlik intensiv kursun məqsədi qərarverici şəxsləri UTT üçün səhiyyə sistemlərinin maliyyələşdirilməsini gücləndirməklə bağlı məlumatlandırmaq idi.

 

Kurs 2011-ci ildə istifadəyə verildiyi vaxtdan dünya üzrə 1000-dən çox mütəxəssis bu kursu bitirib. Kurs, ölkələr arasında səhiyyə maliyyələşməsindəki dəyişikliklər, səhiyyə sistemlərində səmərəliliyin artırılması və resurs məhdudiyyətlərinə baxmayaraq xidmətlərə əlçatanlığın təmin edilməsi də daxil olmaqla əsas problemlərin həllinə dəstək göstərir.

 

Kursun yekununda həyata keçirilən poster müsabiqəsində 30-dan çox ölkənin arasında Azərbaycan nümayəndə heyəti birinci yeri qazanıb.