Qəbələ Rayon Mərkəzi Xəstəxanasında Ulu Öndər Heydər Əliyevin anım günü ilə əlaqədar “Ümummilli və Əbədi Liderimiz” adlı tədbir keçirilib.
Xəstəxanadan Aztibb.az-a verilən xəbərə görə, əvvəlcə Ulu Öndər Heydər Əliyevin və şəhidlərimizin əziz xatirəsi bir dəqiqəlik sükutla yad edilib.
Tədbirdə Qəbələ Rayon Mərkəzi Xəstəxanasının direktoru Ceyhun Əhmədov ömrünü Azərbaycanın inkişafına həsr etmiş Ümummilli Lider Heydər Əliyevin Vətənimiz qarşısında tükənməz xidmətlərindən bəhs edib. Bildirib ki, ulu öndər Heydər Əliyev müasir Azərbaycan dövlətçiliyinin təməlini qoyub və bununla da adını qızıl hərflərlə ölkəmizin tarixinə yazdırıb.
Diqqətə çatdırıb ki, dahi lider Heydər Əliyev tərəfindən əsası qoyulan siyasət Azərbaycan Prezidenti İlham Əliyev tərəfindən uğurla davam etdirilir. Vurğulayıb ki, məhz bu məqsədyönlü siyasət nəticəsində ölkəmiz bütün sahələrdə mühüm nailiyyətlər əldə edib və Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusu tərəfindən işğal altında olan torpaqlarımız düşmən əsarətindən azad olunub.
Daha sonra müəssisənin Laboratoriya şöbəsinin müdiri Kəmalə Alıyeva çıxış edərək görkəmli şəxsiyyət Heydər Əliyevin sadəliyi, səmimiyyəti, vətənpərvərliyi və yüksək insani keyfiyyətləri ilə Azərbaycan xalqının qəlbində unudulmaz izlər buraxdığını qeyd edib.
