Aztibb.az xəbər verir ki, Sabunçu Tibb Mərkəzinin Yoluxucu şöbəsinin müdiri, həkim-infeksionist Namiq Nəbiyev bildirib ki, qızılca virusu ilkin olaraq əsasən 37 dərəcə temperaturla müşahidə edilir.

 

Onun sözlərinə görə, xəstədə üşütmə, titrəmə, yeməyə qarşı həssasiyyət, iştahasızlıq yaranır. Xəstə özünü çox yorğun hiss edir. Ən çox şikayətlərdən biri də göz qapaqlarında ağrıların olmasıdır. 6-8 saat sonra xəstədə müəyyən nahiyələrdə səpkilər müşahidə oluna bilər. Bu səpkilər ən çox yuxarı nahiyələr - döş qəfəsi, sinə, boyun hissədə başlayaraq getdikcə üzdə gözlə görünə biləcək dərəcədə artır.

 

Həkim-infeksionist N.Nəbiyev qızılcaya yoluxan şəxslərin əməl etməli olduğu nüansları açıqlayıb:

 

“Qızılca zamanı qidalanmaya diqqət etmək vacib şərtdir. Bu zaman dietik qidalanmaya üstünlük verilməli və bol maye qəbul olunmalıdır. Həmçinin qıcılcaya yoluxan şəxslərin insanlarla kontaktı minimuma endirilməli, istifadə etdiyi əşyalar dezinfeksiya olunmalıdır. Sözügedən xəstələrdə işığa qarşı həssasiyyət yarandığı üçün xəstənin otağı zəif işıqla işıqlandırılmalı və həkim nəzarətində müalicəsi davam etdirilməlidir”.

 

Şöbə müdiri bunlarla yanaşı, qızılca xəstəliyinin uşaqların sağlamlığı üçün ciddi təhlükə olmasını diqqətə çatdıraraq qızılcaya qarşı peyvəndləmənin önəmliliyini bir daha vurğulayıb.