Mərkəzi Gömrük Hospitalının həkim-infeksionisti Mədinə Abdullayeva Ümumdünya Səhiyyə Təşkilatının təşəbbüsü ilə keçirilən "Antimikrob rezistentliyinin qarşısının alınması" mövzusunda beynəlxalq konfransda iştirak edib.

Hospitaldan Aztibb.az-a bildirilib ki, o, tədbirin panel iclasında “COVID-19 və ictimai sağlamlıqla bağlı digər təxirəsalınmaz hallar- İnfeksiyanın qarşısının alınması və nəzarət istiqamətində yaxşılığa doğru dəyişikliklər” mövzusunda təqdimatla çıxış edib.  

Mədinə Abdullayeva təqdimatında COVID-19 pandemiyası zamanı Mərkəzi Gömrük Hospitalında ən ağır koronavirus xəstələrinin müalicəsi üçün diaqnostika və müalicə xidmətləri üçün bioloji təhlükəsizlik (BSL2 / BSL2+) standartlarına tam cavab verən müasir Real vaxtlı PZR laboratoriyanın yaradılması, eləcə də koronaviruslu xəstələrin müalicəsində ekstrakorporal membran oksigenlənmə cihazından (EKMO) istifadə etməklə uğurlu müalicə prosesi barədə ətraflı məlumat verib.

O, infeksiyanın qarşısının alınması və infeksiyaya nəzarət tədbirlərinin gücləndirilməsi yolunda tələb olunan müasir metodlar və tələblər barədə danışıb, tibb işçilərini infeksiyanın qarşısının alınması istiqamətində olduqca diqqətli olmağa çağırıb.