Qəzza Səhiyyə Nazirliyinin baş direktoru Munir Abdullah əl-Berş İsrailin Qəzzanın şimalındakı İndoneziya Xəstəxanasının 4 saat ərzində boşaldılmasını istədiyini bildirib.

Bu barədə Aztibb.az medimagazin.com.tr-yə istinadla xəbər verir.

Qəzza zolağının şimalındakı Beyt Lahiya qəsəbəsi yaxınlığındakı İndoneziya Xəstəxanasında açıqlama verən Munir Abdullah əl-Berş, İsrail ordusunun mühasirəsində olan xəstəxanaya heç bir yardımın girməsinə icazə verilmədiyini bildirib.

Əl-Cəzirə televiziyasına danışan Berş, İsrail ordusunun "hərbi əməliyyatlar" üçün İndoneziya Xəstəxanasına girmək istədiyini bildirib və xəstəxananın 4 saat ərzində boşaldılması barədə xəbərdarlıq edib.

Xəstəxanada təxminən 200 nəfərin olduğunu deyən baş direktor dünən 450 xəstənin xəstəxananı tərk etdiyini bildirib.

O, xəstəxanada dəfn edilməsi mümkün olmayan 65 cəsədin olduğunu və onlardan 50-nin 10 gündən çox xəstəxana bağçasında gözlədiyini söyləyib.