Səhiyyə Nazirliyi Elmi-Tədqiqat Mamalıq və Ginekologiya İnstitutunda (ETMGİ) hamiləliyin 27-ci həftəsində 1100 qram çəkidə dünyaya gələn körpə 70 günlük müalicədən sonra sağlam şəkildə ailəsinə qovuşub.

Bu barədə Aztibb.az-a İnstitutdan məlumat verilib.

Bildirilib ki, vaxtından əvvəl doğuş təhlükəsi ilə hamiləliyin 27-ci həftəsində ETMGİ-nin Hamiləliyin patologiyası şöbəsinə müraciət edən qadın bir neçə gün şöbədə stasionar nəzarətdə saxlanıldıqdan sonra vəziyyəti ilə əlaqədar təcili şəkildə şöbənin müdiri, həkim mama-ginekoloq, tibb üzrə fəlsəfə doktoru Zinyət Muradova tərəfindən icra olunan qeysəriyyə kəsiyi ilə övladını dünyaya gətirib.

Cinsi qadın, çəkisi 1100 qram, boyu 37 sm olan körpə vəziyyəti ilə əlaqədar dərhal Yenidoğulmuşların reanimasiya və intensiv terapiyası şöbəsinə köçürülüb. Həkim-neonatoloq Günel Xəlilovanın nəzarəti altında yenidoğulmuşa stasionar müalicə planı təyin olunub. Üç dəfə ACV aparatına qoşulub, daha sonra CPAP dəstəyində olub, tənəffüs pozğunluğu, başında III dərəcəli parenximatoz qansızma, mədəciklərin dilatasiyası diaqnozları ilə müalicə olunub. Həmçinin, yenidoğulmuşa ROP müayinə və müalicəsi icra olunub. Şüa-diaqnostika üzrə həkim Təranə Kərimova tərəfindən dinamik olaraq nəzarətdə saxlanılan körpəyə icra olunan 70 günlük uğurlu müalicədən sonra sağlam şəkildə ailəsinə təhvil verilib.