Azərbaycan Tibb Universitetində (ATU) Əməkdar elm xadimi, tibb elmləri doktoru, professor Tağı Tağızadənin anadan olmasının 100 illik yubileyinə həsr olunmuş tədbir keçirilib.
ATU-dan Aztibb.az-a bildirilib ki, tədbiri giriş sözü ilə universitetin rektoru, professor Gəray Gəraybəyli açaraq ölkəmizdə elm və mədəniyyət xadimlərinə Ulu Öndər Heydər Əliyev tərəfindən daima böyük diqqət və qayğı göstərildiyini bildirib: "Ulu Öndər alimlərimizin – təhsil, səhiyyə və mədəniyyət xadimlərinin əməyinə hər zaman böyük qiymət verib. Bu gün də bu böyük ənənəni möhtərəm Prezidentimiz İlham Əliyev davam etdirir. Həmçinin Ulu Öndərin zamanından bizə çox əhəmiyyətli bir ənənə miras qalıb. Bu ənənə ondan ibarətdir ki, vaxtilə ölkəmizin həyatında, elmimizdə, səhiyyəmizdə, təhsilimizdə, mədəniyyətimizdə dərin iz qoymuş ziyalılarımızın yubileyləri qeyd olunur və bu ənənə bu gün də uğurla davam etdirilir".
Rektor Azərbaycan tibb elminin inkişafında böyük xidmətlər göstərmiş, uzun müddət Epidemiologiya kafedrasına rəhbərlik etmiş, Əməkdar elm xadimi, professor Tağı Tağızadənin fəaliyyəti haqda məlumat verib. Bildirib ki, Tağı müəllim Azərbaycanda profilaktik təbabətin inkişafı və tərəqqi tapmasında böyük işlər görüb. Həmçinin Azərbaycanda milli kadrların hazırlanmasında da onun xüsusi rolu olub: "Məhz onun zəhməti sayəsində rəhbərlik etdiyi kafedra nəinki ölkəmizdə, eyni zamanda ittifaq səviyyəsində sayılıb-seçilən kafedralardan hesab olunurdu. Bu kafedrada dəfələrlə ittifaq miqyaslı konfranslar, qurultaylar, seminarlar keçirilib. Bir sözlə, bu böyük şəxsiyyətin Azərbaycan tibb elmi, xalqımız qarşısında danılmaz xidmətləri olub".
Tədbirdə Epidemiologiya və biostatistika kafedrasının müdiri, professor İbadulla Ağayev görkəmli alim T.Tağıyevin həyat və fəaliyyəti barədə məlumat verib. Qeyd edib ki, uzun müddət Tağı müəllim onun həm müəllimi olub, həm də alimin rəhbərliyi altında işləyib.
Professor İ.Ağayev alimin əmək fəaliyyətinə 1941-ci ildə Xalq Səhiyyə Komissarlığının Elmi-Tədqiqat Epidemiologiya və Mikrobiologiya İnstitutunda həkim-epidemioloq kimi başladığını, 1942-ci ildə Kəlbəcər rayonunda əvvəl epidemioloq və parazitoloq, sonra isə rayon səhiyyə şöbəsinin müdiri, 1943-44-cü illərdə Yevlax rayonunda sanitar-epidemioloji stansiyanın və eyni zamanda tropik stansiyanın rəisi, 1944-45-ci illərdə Quba rayon dövlət sanitar müfəttişi vəzifələrində işlədiyini qeyd edib.
Məruzəçi, həmçinin 1945-ci ildə professor T.Tağızadənin yenidən Bakıya qayıtmasından, N.Nərimanov adına Azərbaycan Dövlət Tibb İnstitutunun Epidemiologiya kafedrasında çalışmasından da bəhs edib. Görkəmli alimin 1966-cı ildən 1992-ci ilədək adıçəkilən kafedraya rəhbərlik etdiyini bildirib.
Diqqətə çatdırılıb ki, Tağı müəllim 1952-1956-cı illərdə Bakı 2 saylı tibb məktəbinin direktor müavini və N.Nərimanov adına ATİ-nin müalicə-profilaktika fakültəsinin dekan müavini, 1962-ci ildə isə Azərbaycan Elmi-Tədqiqat Tibbi Parazitologiya və Tropik Təbabət İnstitutunda direktor işləyib, 1966-cı ilə qədər bu vəzifədə çalışıb.
Professor İ.Ağayev çıxışı zamanı görkəmli alimin fəaliyyəti dövründə bütövlükdə tədris prosesinin geniş surətdə yenidən qurulmasından, elmi-tədqiqat işlərinin sürətli inkişafından, respublikada ilk dəfə olaraq Azərbaycan dilində epidemiologiyaya dair dərslik kitabını çap etdirməsindən, elmi kadrların keyfiyyətli hazırlığı sahəsində qazandığı uğurlardan da geniş söhbət açıb.
Tədbir zamanı alimin tələbələri - Əməkdar elm xadimi, “Şöhrət” ordenli akademik Vaqif Şadlinski, Vəli Axundov adına Elmi-Tədqiqat Tibbi Profilaktika İnstitutunun direktoru, professor Adil Allahverdiyev, adıçəkilən institutun şöbə müdiri, professor Akif Salehov, Əczaçılıq texnologiyası və təşkili kafedrasının müdiri, professor Məhbubə Vəliyeva onun haqqında maraqlı xatirələrini bölüşüblər.
Sonda alimin ailəsi adından oğlu BMT-nin eksperti, professor Azad Tağızadə çıxış edərək tədbirin təşkilatçılarına və iştirakçılarına təşəkkürünü bildirib.
Tədbir öz işini elmi məruzələrin dinlənilməsi ilə davam etdirib.
