Bakı Baş Səhiyyə Mərkəzindən Aztibb.az-a verilən məlumata görə, təlimlər Mərkəzin İctimaiyyətlə əlaqələr və müraciətlərlə iş departamentinin Ümumi şöbəsinin böyük mütəxəssisi Əli Quliyev və mütəxəssis Cavid Seyfullazadə tərəfindən aparılır.

 

Təlimlərdə elektron sənəd dövriyyəsinin (ESD) əhəmiyyətindən danışan Ə.Quliyev bildirib ki, sənədlərin elektron formada dövriyyəsi günümüzün əsas tələblərindən biridir. Qeyd olunub ki, bu istiqamətdə Bakı Baş Səhiyyə Mərkəzi digər aidiyyəti qurumlarla birgə çox ciddi addımlar atıb. Yaxın gələcəkdə bütün tabeli qurumlarda hər bir sənədləşmə və sənəd dövriyyəsi yalnız bu sistem vasitəsi ilə həyata keçiriləcək. Hazırda Mərkəz və onun strukturuna daxil olan tibb müəssisələrində sistemin mərhələli şəkildə tətbiqi davam etdirilir. 

 

C.Seyfullazadə isə bildirib ki, 2022-ci ilin fevral ayından etibarən Bakı Baş Səhiyyə Mərkəzində sənəd dövriyyəsi prosesi məhz elektron sənəd dövriyyəsi sistemi vasitəsilə elektron şəkildə aparılır:

“Bununla da sənədlərin qeydiyyatı, çatdırılması və sistem vasitəsilə göndərilməsi sahəsində həm operativlik təmin edilib, həm də resurslara qənaət edilib. Bu təlimlərdə iştirak edən hər bir əməkdaş elektron sənəd dövriyyəsi zamanı qarşılaşacağı çətinlikləri, yarana biləcək hər hansı problemi rahatlıqla həll edə, eyni zamanda müəssisəyə ünvanlanan məktubları, bildirişləri operativ şəkildə cavablandıra biləcək. Bu istiqamətdə Bakı Baş Səhiyyə Mərkəzi bütün lazımi tədbirləri görür”.

 

Qeyd edək ki, nəzəri və praktiki hissələrdən ibarət olaraq keçirilən bu təlimlərdə sənədlərin düzgün qəbulu, emalı və göndərilməsi zamanı diqqət yetirilməli məqamlar barədə ətraflı məlumat verilir, yarana biləcək çətinlik və digər məsələlərə aydınlıq gətirilir.

 

"Ənənəvi kargüzarlığın elektron sənəd dövriyyəsi sisteminə inteqrasiyası" mövzusunda keçirilən bu təlimlərin il sonunadək davam edəcəyi və Mərkəzin tabeliyində fəaliyyət göstərən bütün tibb müəssisələrini əhatə edəcəyi nəzərdə tutulur.