Fələstinin Qəzza zolağının səhiyyə nazirinin müavini Yusuf Əbu ər-Riş İsrail hərbçiləri tərəfindən mühasirəyə alınan Şifa xəstəxanasının həyətində yüzlərlə cəsədin yığıldığını və bunun epidemiyanın xəbərçisi və əsl fəlakət olduğunu bildirib. 

Aztibb.az-ın medimagazin.com.tr-yə istinadla xəbərinə görə, Fələstin səhiyyə nazirinin müavini Əbu ər-Riş AA müxbirinə açıqlamasında Şifa xəstəxanasındakı humanitar vəziyyətlə bağlı məlumat verib.

Xəstəxanadakı humanitar vəziyyətin miqyasına diqqət çəkən Əbu ər-Riş qeyd edib ki, Qəzza zolağının ən böyük xəstəxanası olan Şifa Tibb Kompleksində vəziyyət çox təhlükəlidir, insanlar xəstəxananı tərk etmək məcburiyyətində qalırlar, yaralananlar var.

"Biz dəfələrlə tələb etmişik ki, xəstələrimiz xəstəxanadan çıxarılarkən onların təhlükəsizliyi təmin edilsin.  İsrailin 3 gündür mühasirədə saxladığı Şifa xəstəxanasında xəstələri, yeni doğulmuş körpələri və yaralıları təxliyyə etmək üçün təhlükəsiz yer yoxdur", - deyə Əbu ər-Riş bildirib.