Azərbaycan Tibb Universitetinin (ATU) rektoru, professor Gəray Gəraybəyli Almaniya Heidelberg Universitetinin professoru Michael Keese və universitetin Mannhaym Tibb fakültəsinin əməkdaşı, ümumi cərrah Vüqar Yaqublunu qəbul edib.

Bu məlumat Aztibb.az-a ATU-dan verilib.

Görüşdə iki ali təhsil müəssisəsi arasında perspektiv əməkdaşlıq məsələləri müzakirə olunub, eləcə də tibb təhsili sahəsində müasir çağırışlara dair fikir mübadiləsi aparılıb. Qonaqlara ATU-nun fəaliyyəti barədə geniş məlumat verilib.

Daha sonra professor Gəray Gəraybəyli ATU-nun “Qonaq professor”u sertifikatını M.Keeseyə təqdim edib. Rektor uğurlu əməkdaşlıq üçün professora təşəkkürünü bildirib.

Qeyd edək ki, ATU-nun Böyük Elmi Şurasının qərarına əsasən, 2018-ci ildən etibarən universitetdə “Qonaq professor” vəzifəsi təsis edilib. Hazırda 7 fərqli universitetin nümayəndələri ATU-nun “qonaq professor”larıdır. Bu titula layiq görülən mütəxəssislər müəyyən müddət ərzində universitetin müxtəlif fakültələrində dərs demək üçün dəvət olunurlar.