İsrailin hücumları nəticəsində Qəzza zolağının şimalında yerləşən Mehdi Uşaq Doğum Xəstəxanasının iki həkimi vəfat edib, xəstəxanaya sığınan insanlar yaralanıb. ÜST Qəzzadakı Şifa xəstəxanasındakı mərkəzləri ilə əlaqənin kəsildiyini açıqlayıb.

Aztibb.az-ın medimagazin.com.tr-yə istinadla xəbərinə görə, Şifa xəstəxanasında elektrik enerjisinin tamamilə kəsildiyi, tibb işçiləri, yaralılar və qaçqınlar daxil olmaqla içəridəki hər kəsin İsrail qüvvələrinin atəşinə məruz qaldığı, çıxmaq istəyənlərin isə atəşə tutulduğu bildirilib. Həmçinin inkubatorda oksigendən asılı olan körpələrdən ikisinin elektrik olmaması səbəbindən dünyasını dəyişdiyi qeyd olunub.

Şifa Xəstəxanasının direktoru Mohammed Abu Silmiye xəstəxanaya İsrail silahlı pilotsuz təyyarələri ilə atəş açıldığını bildirib.

O, Birləşmiş Millətlər Təşkilatının Beynəlxalq Uşaq Fondu (UNICEF) X Platformasından etdiyi çağırışda Qəzzada xəstəxanaların və uşaqların qorunmasını və təcili humanitar atəşkəsin əldə edilməsini istəyib.