Xaçmaz Rayon Mərkəzi Xəstəxanasının akt zalında 8 noyabr - Zəfər Günü münasibətilə tədbir keçirilib.
Xəstəxanadan Aztibb.az-a verilən xəbərə görə, tədbir Dövlət Himninin səsləndirilməsi ilə başlayıb.
Sonra Azərbaycan Respublikasının ərazi bütövlüyü və suverenliyi uğrunda canlarını qurban vermiş qəhrəman şəhidlərimizin müqəddəs ruhları bir dəqiqəlik sükutla yad edilib.
Vətən müharibəsinin 3-cü ildönümünə həsr olunmuş tədbiri giriş sözü ilə açan xəstəxananın direktoru Səyyaf Tağıyev 44 gün davam edən və Prezident, Ali Baş Komandan İlham Əliyevin rəhbərliyi ilə müzəffər ordumuzun qəhrəmanlığı sayəsində ərazilərimizin işğaldan azad edilməsi ilə nəticələnən Vətən müharibəsinin tariximizin ən parlaq səhifəsinə, Azərbaycan xalqının iftixar və qürur mənbəyinə çevrildiyini qeyd edib.
Daha sonra direktorun inzibati işlər üzrə müavini Murad Həbibov çıxış edərək bildirib ki, 2020-ci il sentyabrın 27-də başlayan Vətən müharibəsi Azərbaycan torpaqlarının azad edilməsi üçün yeni mərhələnin başlanğıcı oldu. Ali Baş Komandan İlham Əliyevin rəhbərliyi ilə Azərbaycan ordusu Qarabağ torpaqlarında mərdliklə vuruşaraq əsl qəhrəmanlıq dastanı yazdı, əsgər və zabitlərimizin rəşadəti sayəsində tarixi ədalət bərpa edildi və milli qürurumuz zəfər çaldı.
Tədbirdə müharibənin ilk günündən son gününədək ön cəbhədə gecə-gündüz yorulmadan, usanmadan yaralılara yardım göstərmiş, əsgərlərimizin həyatda qalması naminə tibbi bacarıqlarını əsirgəməmiş, Xaçmaz Rayon Mərkəzi Xəstəxanasının həkim stomatoloqu Etibar Sultanov çıxış edərək müharibədə yaşadıqlarını, xatirələrini tədbir iştirakçıları ilə bölüşüb.
Sonda Zəfər gününə həsr edilmiş videoçarx izlənilib.
