Sumqayıt Tibb Mərkəzinin (STM) Təcili Tibbi Yardım Xəstəxanasında 8 Noyabr - Zəfər Gününə həsr olunmuş tədbir keçirilib.

STM-dən Aztibb.az-a verilən xəbərə görə, əvvəlcə ölkəmizin müstəqilliyi, torpaqlarımızın bütövlüyü uğrunda canından keçən şəhidlərimizin əziz xatirəsi bir dəqiqəlik sükutla yad edilib.

Xəstəxananın baş həkimi Rauf Sadıxov çıxış edərək 44 günlük Vətən müharibəsində qazanılan tarixi qələbədən danışıb, Azərbaycan Silahlı Qüvvələrinin öz gücünü bütün dünyaya sübut etdiyini vurğulayıb.

R.Sadıxov 8 noyabr tarixinin Zəfər Günü kimi təntənəli səkildə qeyd edilməsindən qürür duyduqlarını, eyni zamanda hərbçilərimizin cəsarətindən, qəhrəmanlığından və Ali Baş Komandan, Prezident İlham Əliyevin Zəfər səlnaməsindən bəhs edib.

Vətən müharibəsinin ilk günlərindən cəbhə bölgəsində olan Təcili Tibbi Yardım Xəstəxanasının Travmatologiya şöbəsinin müdiri Aqil Yusubov isə təəssüratlarını tədbir iştirakçıları ilə bölüşüb.

Cərrahiyyə şöbəsinin müdiri Namiq Fərəcov Azərbaycan xalqının əzmi və iradəsi, iqtisadi gücü, müasir ordu quruculuğu və xalq-iqtidar birliyindən və ölkəmizin qələbəsini təmin edən mühüm amillərdən danışıb.

Tədbir digər çıxışlarla yekunlaşıb.