TƏBİB-in tabeliyində fəaliyyət göstərən tibb müəssisələrində məlumatların elektronlaşdırılması prosesi davam etdirilir.

Bakı Baş Səhiyyə Mərkəzindən Aztibb.az-a bildirilib ki, ötən ay uşaqlara vurulan peyvəndlərlə bağlı məlumatların “e-tabib” proqramına daxil edilməsi üzrə məsul şəxslərin imtahanında uğursuz nəticə göstərmiş əməkdaşlar təkrar təlimlərə cəlb edilib.

Qeyd edək ki, ilk imtahanda Bakı Baş Səhiyyə Mərkəzinin strukturuna daxil olan 48 tibb müəssisəsinin (uşaq poliklinikaları) 104 tibb bacısı iştirak edib və onlardan 37 nəfərin nəticəsi 50%-dən aşağı olduğuna görə, göstəriciləri məqbul hesab edilməyib. Bu səbəbdən də təkrar təlimlərə cəlb edilən məsul şəxslərin bilik və bacarıqlarının yenidən qiymətləndirməsinə qərar verilib.

Bakı Baş Səhiyyə Mərkəzində keçirilən təlimlər Pediatrik xidmətlərin təşkili şöbəsinin böyük mütəxəssisi Rəhilə Əsgərova və Monitorinq şöbəsinin mütəxəssisi Aytel Əmrahova tərəfindən keçirilir.

Məlumat üçün bildirək ki, Milli Peyvənd Təqviminə uyğun olaraq, peyvəndləmə prosesinə cəlb edilən uşaqların məlumatlarının “e-tabib” proqramına daxil edilməsi zamanı qarşıya çıxan problemlər və atılacaq addımların öyrədilməsi məqsədi ilə bir müddətdir ki, məsul şəxslərə təlimlər verilir.