TƏBİB-in dəstəyilə "Medinex" sərgisinin tədbirlər proqramı çərçivəsində “Müasir kardiologiya: dünən və bu gün” adlı panel müzakirəsi təşkil edilib.
Aztibb.az-a TƏBİB-dən bildirilib ki, panel sessiyasında millət vəkili, Əməkdar həkim, Azərbaycan Ürək və Sağlamlıq Assosiasiyası İdarə Heyətinin sədri, t.e.d. Rəşad Mahmudov, Mərkəzi Gömrük Hospitalının uzman invaziv kardioloqu İlqar Tahiroğlu, Azərbaycan Kardiologiya Cəmiyyətinin sədri Üzeyir Rəhimov, Yeni Klinikanın uzman uşaq kardioloqu Bəhruz Əliyev təqdimatlarla çıxış ediblər.
Təcrübəli mütəxəssislərin təqdimatında “Dünəndən sabaha gedən yolda biz və ürək-damar xəstəlikləri”, “Azərbaycanda yeni struktur terapiyalar”, “Azərbaycanda ürək-damar hadisələrini azaltmaq üçün yol xəritəsi”, “Uşaq kardiologiyasında invaziv müalicə üsulları” mövzuları müzakirə edilib.
Sonda mütəxəssislər tərəfindən iştirakçıların sualları cavablandırılıb, fikir mübadiləsi aparılıb.
