Azərbaycan Respublikası Dövlət Gömrük Komitəsi Tibbi Xidmət İdarəsinin rəisi, t.ü.f.d. Ceyhun Məmmədov və rəis müavini, t.ü.f.d., dosent İsmayıl Əfəndiyev 30-31 oktyabr 2023-cü il tarixlərində Ümummilli Lider Heydər Əliyevin və akademik Zərifə Əliyevanın 100 illik yubileylərinə həsr edilmiş “Görmənin fiziologiyası və peşə patologiyaları: fundamental və tətbiqi aspektlər” mövzusunda AMEA-da keçirilən beynəlxalq konfransda iştirak ediblər.

Mərkəzi Gömrük Hospitalından Aztibb.az-a bildirilib ki, konfransın plenar iclasında t.ü.f.d. İsmayıl Əfəndiyev müəlliflərin adından “Azərbaycanda kəskin peşə və kütləvi kimyəvi zəhərlənmələr və onların idarə olunması” mövzusunda təqdimatla çıxış edib.

Dosent İsmayıl Əfəndiyev qeyd edib ki, Akademik Zərifə xanım Əliyevanın elmi fəaliyyətinin əsas istiqamətləri peşə patologiyasına həsr edilmişdir. Göstərilən istiqamətdə apardığı elmi-tədqiqat işlərinin nəticələri görkəmli alimin "Şin istehsalatında gözün peşə patologiyası", "Xronik yod intoksikasiyası zamanı oftalmologiya" və "Yod sənayesində gözün peşə xəstəliyinin profilaktikası" kimi qiymətli monoqrafiyalarında öz əksini tapmışdır. “Azərbaycanda kəskin peşə və kütləvi kimyəvi zəhərlənmələr və onların idarə olunması” mövzusunda elmi iş Akademik Zərifə xanım Əliyevanın əziz xatirəsinə həsr edilib.

İsmayıl Əfəndiyev akademik Zərifə Əliyevanın Azərbaycan tibb elminin, oftalmologiya və fiziologiyanın inkişafına verdiyi dəyərli töhfələrdən söz açıb, şin istehsalında gözün peşə patologiyası, xroniki yod intoksikasiyası ilə bağlı oftalmologiya, yod sənayesində gözün peşə xəstəliyinin profilaktikası, eyni zamanda Azərbaycanda peşə və kütləvi kimyəvi zəhərlənmələr barədə danışıb.

Qeyd edək ki, AMEA Rəyasət Heyəti, Səhiyyə Nazirliyi, AMEA-nın Biologiya və Tibb Elmləri Bölməsi, akademik Zərifə Əliyeva adına Milli Oftalmologiya Mərkəzi, Elm və Təhsil Nazirliyi akademik Abdulla Qarayev adına Fiziologiya İnstitutu və Azərbaycan Fizioloqlar Cəmiyyətinin birgə təşkilatçılığı ilə baş tutan konfransda Türkiyə, Rusiya, Belarus, Gürcüstan və digər ölkələrdən alim və mütəxəssislər, tanınmış fizioloqlar iştirak ediblər.