İsrail ordusu Qəzza İslam Universitetinin Tibb fakültəsinin nəzdində fəaliyyət göstərən Türk-Fələstin Dostluq Xəstəxanasına hücum edib.

Aztibb.az-ın medimagazin.com.tr-yə istinadla xəbərinə görə, Türk-Fələstin Dostluq Xəstəxanasının direktoru Sübhi Sukeyk bildirib ki, İsrailin hədəf aldığı Qəzzada səhiyyə idarəsinə aid xəstəxanada dağıntılar baş verib. Türk-Fələstin Dostluq Xəstəxanasının üçüncü və sonuncu mərtəbəsi bombalandı, xəstəxanaya ciddi ziyan dəyib.

Xəstəxananın 3-cü mərtəbəsində baş verən yanğının nəzarət altına alındığını bildirən S.Sukeyk qeyd edib ki, bombalama bəzi elektromexaniki sistemlərin sıradan çıxmasına səbəb olub, xəstələrin və səhiyyə işçilərinin həyatını təhlükəyə atıb.

Qeyd edək ki, Türkiyə tərəfindən tikilən xəstəxana 6 il əvvəl tamamilə yerli səhiyyə idarəsinə verilib. Qəzza zolağında xərçəng xəstələrinin müalicə olunduğu Türk-Fələstin Dostluq Xəstəxanası hərtərəfli təhsil və araşdırma xəstəxanasıdır. Bu tibb müəssisəsi, həmçinin Qəzzada ehtiyac duyulan həkim, tibb bacısı və bu kimi tibb işçiləri yetişdirir.

Fələstinin ən böyük xəstəxanalarından biri olaraq seçilən Türk-Fələstin Dostluq Xəstəxanası təqribən 34 min 800 kvadratmetr sahədə inşa edilib, 3 mərtəbəlidir və 180 çarpayılıqdır.