Xəstəxanadan Aztibb.az-a bildirilib ki, tədbirdə Respublika Gigiyena və Epidemiologiya Mərkəzinin İmmunoprofilaktika bölməsinin müdiri Tərlan Həşimov və Parazitologiya şöbəsinin müdiri Gülafət Azadəliyeva iştirak etdilər.

 

Gülafət Azadəliyeva poliomielit kimi ağır yoluxucu xəstəliyin 15-20 il bundan əvvələ qədər Azərbaycanda geniş yayıldığını və görülən tədbirlər nəticəsində bu xəstəliyə yoluxanların sayının sıfıra endirildiyini bildirib. 2002-ci ildə ÜST-nin Azərbaycana “Poliomielitdən azad ölkə” statusunu verdiyini qeyd edən Gülafət Azadəliyeva 2005-ci ildən başlayaraq qızılca və məxmərək əleyhinə də tədbirlərin genişləndiyini diqqətə çatdırıb.

 

Respublika Gigiyena və Epidemiologiya Mərkəzinin İmmunoprofilaktika bölməsinin müdiri Tərlan Həşimov “Vəhşi Poliomielit Virusunun yayılmasında, Kəskin Süst İflici (KSİ) üzərində epidemioloji nəzarətin təşkilində qlobal və regional səviyyələrdə mövcud vəziyyət”, o cümlədən “Regional Sertifikasiya Komissiyasının tövsiyələri” mövzularında təqdimatla çıxış edib. Poliomielitin eradikasiyasından bəhs edən mütəxəssis vəhşi polio viruslarının yayılması coğrafiyası, ÜST-nin Avropa regionunda poliomielit alovlanmasına cavab olaraq immunlaşdırma tədbirləri, xəstələrin müalicəsi istiqamətində atılmış addımlarla bağlı məruzə edib.