ATU-nun Rezidentura və magistratura şöbəsi Azərbaycan Reanimatoloqlar və Anestezioloqlar Cəmiyyəti ilə birgə Tədris Terapevtik Klinikasında rezidentlər üçün növbəti seminar keçirib.

ATU-dan Aztibb.az-a bildirilib ki, tədbirdə şöbənin müdir müavini, assistent Namiq Xəlilov artıq bir ənənəyə çevrilən bu seminarların rezidentlərin və gənc həkimlərin həyatında böyük əhəmiyyətə malik olduğunu deyib. Seminarların baş tutmasında ATU-nun və klinika rəhbərliklərinin rolunu qeyd edən N.Xəlilov dəstəyə görə təşəkkür edib.

Daha sonra ATU-nun Anesteziologiya və reanimatologiya kafedrasının assistenti Pərisa Xoşbonyaninin “Nutritiv dəstəyin intensiv terapiyada rolu” mövzusunda məruzəsi dinlənilib. Məruzəçi bildirib ki, kritik vəziyyətlərin müalicəsinin müasir yanaşmasında nutritiv dəstəyin rolu əvəzsizdir. Kritik xəstələrdə hiperkatabolizm-hipermetabolizm sindromunun inkişafı və mədə-bağırsaq traktının ciddi funksional pozulmaları ağır metabolik pozğunluqların və mütərəqqi protein-enerji çatışmazlığının inkişafına səbəb olur.

Pərisa Xoşbonyaninin sözlərinə görə, nutritiv çatışmazlıq və metabolik pozğunluqların qeyri-adekvat korreksiyası terapevtik tədbirlərin effektivliyini əhəmiyyətli dərəcədə azaldır, septik və infeksion ağırlaşmaların inkişaf riskini artırır, xəstələrin xəstəxanada qalma müddətini uzadır, ölüm nisbətini artırır. Kritik vəziyyətin formalaşmasının əsas patogenetik zənciri - sistem iltihab reaksiyasıdır. Poliorqan çatışmazlıq sistem iltihab reaksiyasının ən ağır formasıdır və reanimasiya və intensiv terapiya şöbəsinin xəstələrində letallığın əsas səbəbi sayılır.

Diqqətə çatdırılıb ki, nutritiv terapiyanın əsas məqsədlərindən bəhs edən məruzəçi əlavə edib ki, hipermetabolizm-hiperkatabolizm sindromunun korreksiyası bədənin energetik və plastik tələbatının ödənilməsi, immun funksiyasının modulyasiyası, toxumaların, skelet və tənəffüs əzələlərin funksiyalarına dəstək, bağırsaq çatışmazlığı sindromunun müalicəsi, poliorqan çatışmazlığın profilaktikası və müalicəsidir.

İşgüzar şəraitdi keçən seminarın sonunda P.Xoşbonyani rezidentlərin çoxsaylı suallarını cavablandırıb.