13 gündür İsrail tərəfindən blokada və bombardman altında olan Qəzzada Əl-Əqsa Şəhidləri Xəstəxanasında dərman və tibbi ləvazimat ehtiyatının tükəndiyi bildirilib.
Aztibb.az-ın medimagazin.com.tr-yəistinadla xəbərinə görə, Əqsa Şəhidləri Xəstəxanasının direktoru İyad əl-Caberi verdiyi açıqlamada xəstəxanadakı vəziyyətin “çox riskli” səviyyəyə çatdığını deyib. O, Əqsa Şəhidləri Xəstəxanasının Qəzzanın mərkəzi hissəsində minlərlə yaralı və xəstənin həyatı təhlükədə olduğunu söyləyib.
Direktor qeyd edib ki, oktyabrın 7-dən etibarən İsrail Qəzzanı bütün giriş-çıxışlara bağladığı üçün xəstəxanadakı mühüm dərman və tibbi ləvazimat ehtiyatı tükənib. İyad əl-Caberi İsrailin Qəzzaya tibbi ləvazimatların daxil olmasına icazə verməsi üçün beynəlxalq təşkilatları müdaxiləyə çağırıb.
Ümumdünya Səhiyyə Təşkilatının (ÜST) baş direktoru Tedros Adhanom Qabreyesus Qəzzadakı sağlamlıq vəziyyəti ilə bağlı dünən verdiyi açıqlamada ÜST-nin Qəzza üçün bölgəyə göndərdiyi tibbi ləvazimatların 4 gündür sərhəddə gözlədiyini bildirib. O, Qəzzaya həyat qurtaran tibbi ləvazimatların çatdırılması üçün təcili girişə ehtiyac olduğunu və tərəflər arasında zorakılığın dayandırılmasının vacibliyini qeyd edib.