Aztibb.az-a STM-dən bildirilib ki, tədbiri giriş sözü ilə açan Mərkəzin direktor müavini Arzu Bəndəliyeva bildirib ki, 18 oktyabr 1991-ci il tarixində "Azərbaycanın dövlət müstəqilliyi haqqında" Konstitusiya Aktının qəbul edilməsi ilə ölkəmizdə Şərqdə ilk respublikanın varisi kimi Azərbaycan tarixinin yeni dönəmi başlayıb. Vurğulayıb ki, müstəqilliyimizin qorunub saxlanması Ulu Öndərin adı ilə bağlıdır.

 

Qeyd olunub ki, müasir Azərbaycan ulu öndər Heydər Əliyevin ideyaları və Prezident İlham Əliyevin qətiyyəti sayəsində gündən-günə daha da inkişaf edir, qüdrətlənir.

 

1 nömrəli Xəstəxananın baş həkimi Mətləb Musayev ulu öndərin əsasını qoyduğu müdrik, düşünülmüş siyasəti dövrün tələblərinə uyğun olaraq davam etdirən Prezident İlham Əliyevin rəhbərliyi ilə Azərbaycanın nəinki regionda, dünyada söz sahibinə çevrildiyini diqqətə çatdırıb.

 

Digər çıxış edənlər bildiriblər ki, güclü Azərbaycan dövləti öz suverenliyini, müstəqilliyini qorumağa qadir olduğunu ərazi bütövlüyünü bərpa etməklə sübuta yetirdi.

 

Prezident İlham Əliyevin rəhbərlik etdiyi Azərbaycan heç zaman olmadığı qədər güclü, qüdrətlidir və bu günkü müasir müstəqil, qalib Azərbaycan Ümummilli lider Heydər Əliyevin görmək istədiyi Azərbaycandır.