TƏBİB-in tabeliyindəki Sumqayıt Tibb Mərkəzi (STM) orta ümumtəhsil məktəblərində mütəmadi olaraq maarifləndirici tədbirlər keçirir.
STM-dən Aztibb.az-a bildirilib ki, növbəti belə tədbir Yusif Məmmədəliyev adına 31 nömrəli tam orta məktəbdə və "Təfəkkür" liseyində "Profilaktik peyvəndlər" və "Kəskin respirator xəstəliklər" mövzularında keçirilib.
4 nömrəli Ailə Sağlamlıq Mərkəzinin (ASM) ailə həkimi, pediatrları Sevinc Abdullayeva, Nəsibə Fərhadova, Zəminə Sadıqova və Sevinc Hüseynova uşaqlarda profilaktik peyvəndin əhəmiyyəti ilə bağlı, eləcə də kəskin respirator xəstəliklər və onlardan qorunmaq yolları haqqında valideynlərə ətraflı məlumat verib.
Qarşılıqlı fikir mübadiləsi şəraitində keçən tədbirlərdə valideynləri maraqlandıran suallar cavablandırılıb.
Qeyd edək ki, bu kimi tədbirlərin əsas məqsədi bir çox infeksion xəstəliklərdən qorunmaqda ən effektiv vasitə olan peyvəndlərlə bağlı insanları maarifləndirmək, uşaqların və gələcəyimizin təhlükəsizliyini təmin etməkdir.
