Azərbaycan Respublikası Səhiyyə Nazirliyi, Azərbaycan Tibb Universiteti, Naftalan Şəhər İcra Hakimiyyətinin dəstəyi və Səhiyyə Nazirliyi Elmi-Tədqiqat Tibbi Bərpa İnstitutunun təşkilatçılığı ilə Naftalanda "İnsultun reabilitasiyası və elektrostimulyasiya üzrə I regional təlim" keçirilib.

Bu barədə Aztibb.az-a Elmi-Tədqiqat Tibbi Bərpa İnstitutundan xəbər verilib.

Təlimin məqsədi insultlu xəstələrin reabilitasiyasının təşkili, bu sahədə olan elmi və yeniliklərin praktik həkimlərə çatdırılması olub. Problemin müxtəlif sahələrinə həsr olunmuş məruzələr təqdim olunub.

Tədbirdə insultlu xəstələrdə udma pozuntularının müalicəsi haqqında Avropada təlim keçmiş həkimlər öz biliklərini paylaşıblar. Eyni zamanda, insultlu xəstələrin reabilitasiyasında mühüm yer tutan elektrostimulyasiya növləri ilə bağlı təlimlər keçirilib.

Təlimdə açılış nitqi ilə Səhiyyə Nazirliyi Elmi- Tədqiqat Tibbi Bərpa İnstitutunun direktoru, prof. Sədaqət Hüseynova çıxış edib. O, təlimin mahiyyəti haqqında məlumat verib. Daha sonra "İnsultlu xəstələrin müalicəsində müasir yanaşmalar" mövzusu ilə çıxış edib.

Təlimə Azərbaycanın müxtəlif bölgələrindən həkimlər (nevroloq, reabilitoloq, fizioterapevtlər, ailə həkimləri, orta tibb işçiləri) qatılıblar.

İştirakçılar sertifikatlarla, davamlı tibbi təhsil(DTT) kredit balları ilə təltif olunublar.