Mərkəzi Klinikanın baş həkimi, ürək-damar cərrahı, professor Kamran Musayev icbari tibbi sığortanın əhalinin sağlamlığının qorunmasında əhəmiyyətindən danışıb.
Aztibb.az-ın xəbərinə görə, o, ölkəmizdə tətbiq olunan icbari tibbi sığorta sisteminin dünyadakı ən mütərəqqi icbari tibbi sığorta sistemləri ilə müqayisə oluna biləcəyini bildirib.
"İcbari tibbi sığortadan hər bir Azərbaycan vətəndaşı yararlana bilər", - deyən professor Kamran Musayev bu sistemin geniş diapazonlu xəstəlikləri əhatə etdiyini vurğulayıb.
Kamran Musayev ürək-damar xəstəliklərinin dünyada ölümlə nəticələnən və əlilliyə səbəb olan xəstəliklər arasında birinci yerdə dayandığını söyləyərək, bu xəstəliklərin müayinə və müalicəsinin də kifayət qədər bahalı olduğunu diqqətə çatdırıb.
O, ölkəmizdə tətbiq olunan icbari tibbi sığortanın kardioloji xəstəlikləri də əhatə etdiyini və bu gün keyfiyyətli xidmətin bütün Azərbaycan vətəndaşları üçün əlçatan olduğunu vurğulayıb.