ATU-nun Sitologiya, embriologiya və histologiya kafedrasının baş müəllimi, tibb üzrə fəlsəfə doktoru Aygün Əliyarbəyova qardaş Türkiyə Respublikasında Cümhuriyyət quruluşunun 100 illiyinə həsr olunmuş 26-cı Beynəlxalq Türkiyə Elektron Mikroskopiya Konqresində iştirak edib.

Bu barədə Aztibb.az-a ATU-dan məlumat verilib.

Tədbirdə həm Türkiyə, həm də digər ölkələrdən mikroskopiya sahəsində tanınmış mütəxəssislər iştirak ediblər.

1971-ci ildə professor Türkan Erbenginin başçılığı ilə əsası qoyulan Türk Elektron Mikroskopiya Dərnəyinin təşkil etdiyi bu konqresdə 300-ə yaxın tezis qəbul olunub.

Dünyaya meydan oxumuş COVID-19 pandemiyası dövründən ağciyər xəstəlikləri və onun patogenezində iştirak edən faktorlar həm ölkəmizdə, həm də xaricdə aparılan elmi-tədqiqat işlərində əsas istiqamət kimi dəqiqliklə öyrənilməkdədir.

Konqresdə “Makrofaq miqrasiyası inhibitor faktoru (MIF) təsirindən ağciyərlərin strukturunda və MİF ekspressiyasında baş verən dəyişikliklər” mövzusunda məruzə ilə çıxış edən A.Əliyarbəyova əldə etdiyi məlumat və nəticələri bölüşüb. O, iştirakçıları makrofaq miqrasiyası inhibitor faktorunun bir sıra xəstəliklərin patogenezində olan rolu və təsiri haqqında məlumatlandırıb, onun ağciyərlərin struktur elementlərində törətdiyi morfoloji dəyişikliklərin nəticələrini təqdim edib.

Bundan başqa, A.Əliyarbəyova Eskişehir Texnik Universiteti və Anadolu Universitetində təşkil olunmuş kurslarda iştirak edərək, sertifikatlarla təltif olunub.